Маёй зямлі куточак сэрдцу дарагі
26 чэрвеня споўнілася 954 гады з дня заснавання нашага горада Орша, звесткі пра якога ўпершыню былі ўзгаданы ў старажытным летапісным зборы, які называецца “Аповесць мінулых гадоў”.
Супрацоўнікі дзіцячай бібліятэкі імя У.С. Караткевіча да Дня горада аформілі краязнаўчую кніжную выставу. Чытачы могуць больш падрабязна пазнаёміцца з мінулым і сучасным Оршы, з яе выдатнымі мясцінамі. Кнігі дапамогуць даведацца і параўнаць, якім горад быў раней і як гэтыя ж мясціны выглядаюць сёння.
Галоўнае багацце Аршаншчыны – яе жыхары. Менавіта іх працай і упартасцю, розумам і талентам, мужнасцю і адвагай, любоўю да сваёй малой радзімы створана ўсё, што складае сёння гонар і славу Аршанскай зямлі. У раздзеле “Майстры слова Аршанскага краю” прадстаўлены кнігі нашых землякоў, аршанскіх пісьменнікаў і паэтаў, услаўляючых прыгажосць і веліч роднага краю.
Асаблівае месца займаюць кнігі пра Вялікую Айчынную вайну. Імёнамі Герояў Савецкага Саюза, падпольшчыкаў, партызан названы больш за 30 вуліц горада. Удзячныя аршанцы ўзвялі ў гонар воінаў вызваліцеляў мноства помнікаў. Даведацца аб подзвігах абаронцаў Оршы і памятных мясцінах гэтых падзей вы зможаце прачытаўшы кнігі з раздзелу “Аршаншчына гераічная”.
Супрацоўнікі дзіцячай бібліятэкі імя У.С. Караткевіча віншуюць усіх з Днём горада і запрашаюць да сябе.Няхай наш горад заўсёды квітнее, расце і развіваецца, хай кожны яго жыхар і госць будзе неверагодна шчаслівы і жыццярадасны. Жадаем усім чыстага неба над галавой, светлых надзей, узаемапавагі і дабрабыту.
З Днём нараджэння, любімы горад!
Бібліятэкар Нароўская Н.