Ззяць, гуляць з табой гатовы словы нашай роднай мовы!
21 лютага ў бібліятэцы імя У. Корбана ў Міжнародны дзень роднай мовы адбылася моўная пяціхвілінка “Ззяць, гуляць з табой гатовы словы нашай роднай мовы!”. Сёння ў свеце шмат цудоўных моў. Адны з іх вабяць сваёй прыгажосцю і непаўторнасцю, другія – мілагучнасцю. У кожнага чалавека ёсць родная мова. Менавіта на гэтай мове ён размаўляе з роднымі, сябрамі, знаёмымі. І вельмі дрэнна, калі чалавек пачынае забываць сваю мову, не шануе яе. Для нас, беларусаў, роднай мовай з’яўляецца беларуская.
Таму супрацоўнікі дзіцячага абанемента ўвесь дзень гаварылі на беларускай мове. З вялікім задавальненнем юныя чытачы прымалі ўдзел у розных заданнях: адгадвалі загадкі, перакладалі словы з рускай мовы на беларускую, спрабавалі вымавіць беларускія хуткамоўкі, падбіралі словы з супрацьлеглым значэннем і знаходзілі памылкі ў кароткіх вершах. Таксама вялікі інтарэс выклікала кніжная выстава, дзе хлопчыкі і дзяўчынкі знаёміліся з цікавымі і пазнавальнымі кнігамі на беларускай мове.
Дзеці пазбавіліся страху і не сароміліся недасканалай гаворкі. Пачынаць гаварыць на роднай мове заўсёды цяжка, але кожны чалавек павінен ведаць гэту мову і не саромецца на ёй размаўляць. Родная мова — душа народа. Пакуль жыве мова, жыве і народ.
Бібліятэкар Г. Вербіна