Свята паэзіі ў Ляўках
1 ліпеня ў Ляўках, на тэрыторыі Купалаўскага мемарыяльнага запаведніка, адбылося свята паэзіі “Купала заўсёды ў сэрцы маім”, прымеркаванае да Дня нараджэння народнага паэта Беларусі. Дзяржаўны літаратурны музей Янкі Купалы пры падтрымцы аддзела культуры Аршанскага райвыканкама падрыхтавалі святочную праграму з удзелам паэтаў і пісьменнікаў, членаў Саюза пісьменнікаў Беларусі, прадстаўнікоў творчай інтэлігенцыі, музычных калектываў і выканаўцаў.
Прывітальнымі спевамі і духмяным караваем сустракалі ганаровых гасцей удзельнікі народнага калектыву народнай музыкі і песні “Выцінанка”.
Ганаровыя госці свята – вядомыя беларускія пісьменнікі – аддалі даніну павагі класіку беларускай літаратуры і ўсклалі кветкі да помніка песняру.
Шчырымі апладысментамі гледачы сустракалі старшыню Віцебскага абласнога аддзялення грамадскага аб’яднання “Саюз пісьменнікаў Беларусі”, лаўрэата шматлікіх літаратурных конкурсаў Тамару Іванаўну Краснову-Гусачэнка, пісьменнікаў М.У. Намеснікава, С.А. Красава, І.Р. Радзіхоўскую з г. Віцебска, І.В. Саламаха і Л.Р. Піскун з г. Полацка, А.І. Чарота, І.М. Фралову, А.У. Басікірскую, Р.Ю. Малахоўскага, К.С. Роўда з Мінска, аршанскіх пісьменнікаў К. Нілава, А. Прохарава, Т. Краеўскую.
Спецыяльным госцем свята стаў Заслужаны калектыў Рэспублікі Беларусь “Нацыянальны акадэмічны аркестр сімфанічнай і эстраднай музыкі Рэспублікі Беларусь імя М.Я.Фінберга” які выступіў з канцэртнай праграмай на словы Янкі Купалы. Сярод выступоўцаў: лаўрэаты міжнародных і рэспубліканскіх конкурсаў і заслужаныя артысты Рэспублікі Беларусь Наталля Тамэла і Дзімітрый Качароўскі.
Шмат добрых песен прагучала ў выкананні народнага калектыву народнай музыкі і песні “Гагарынскія музыкі” Вусценскага дома культуры.
Духмянымі нацыянальнымі стравамі і прысмакамі гасцей мерапрыемства частавалі народныя аматарскія аб’яднанні – “Надзея” Андрэеўшчынскай сельскай бібліятэкі-клуба, “Пралеска” Дачнінскай сельскай бібліятэкі, “Жаночыя сакрэты” Вусценскай сельскай бібліятэкі і народнае аматарскае аб’яднанне “Гаспадынька” ДУК “Аршанскі раённы Цэнтр культуры”.
Свята ў Ляўках падаравала цудоўны дзень для адпачынку ў адным з найпрыгажэйшых куточкаў Беларусі, кожны змог адчуць мілагучнасць роднай мовы і атрымаў асалоду ад традыцыйных беларускіх і аўтарскіх песень.
Фотальбом свята глядзець