Дзень беларускага пісьменства ў Касцюковічах
Кожную першую нядзелю верасня ў нашай краіне адзначаецца Дзень беларускага пісьменства. Асноўная ідэя свята – беражлівае захаванне і развіццё духоўнай спадчыны Беларусі, папулярызацыя нацыянальных культурных традыцый, падтрымка беларускай літаратуры і кнігавыдання.
Штогод фестываль прымае горад, які пакінуў яркі след у гісторыі, навуцы і культуры Рэспублікі Беларусь. Сёлета цэнтрам прыцягнення стаў гасцінны горад Касцюковічы Магілёўскай вобласці. Варта адзначыць, што горад унікальны тым, што з'яўляецца радзімай цэлай плеяды беларускіх пісьменнікаў: А. Куляшова, І.Чыгрынава, В. Хомчанкі, А. Русецкага і А. Пісьмянкова.
5 і 6 верасня фестываль аб'яднаў літаратараў, выдаўцоў і ўсіх знатакоў роднага слова, а горад ператварыўся ў грандыёзны асветніцкі цэнтр. Падчас святкавання Дня беларускага пісьменства адбылося ўрачыстае адкрыццё скульптурнай кампазіцыі «Алесь і Алеся». У аснове яе вобраза - лірыка народнага паэта Аркадзя Куляшова. На цэнтральнай плошчы горада разгарнуліся ўнікальныя экспазіцыі кнігі і прэсы, тэматычныя інтэрактыўныя прэзентацыі, павільёны Нацыянальнай бібліятэкі і вядучых беларускіх выдавецтваў. Для ўдзельнікаў і гасцей свята былі арганізаваны майстар-класы, інтэрактыўныя гульні, віктарыны.
У тэматычным павільёне «Музей рэдкай кнігі» наведвальнікі змаглі ўбачыць сапраўдныя скарбы: ад старадаўніх фаліянтаў і факсімільных копій да маленькіх мініяцюрных выданняў, сабраных з розных куткоў краіны і прадстаўленых Нацыянальнай бібліятэкай, Прэзідэнцкай бібліятэкай, Віцебскай абласной бібліятэкай імя У. І. Леніна і многімі іншымі. Супрацоўнікі Цэнтральнай бібліятэкі імя А. С. Пушкіна: Алена Фядосава і Валянціна Самонава сталі актыўнымі ўдзельнікамі фестывалю і прывезлі ўнікальную калекцыю кніг Янкі Сіпакова, рукапісы, яго асабістыя рэчы і кнігі з аўтографамі беларускіх пісьменнікаў. Наведвальнікі змаглі не толькі ўбачыць творы нашага земляка, але і літаральна дакрануцца да гісторыі жыцця пісьменніка. Рады, што змаглі падараваць гасцям свята магчымасць бліжэй пазнаёміцца з творчасцю нашага выдатнага земляка.
Праграма фестывалю падарыла магчымасць пагутарыць з вядомымі беларускімі пісьменнікамі, задаць пытанні, абмеркаваць творчасць, а таксама атрымаць аўтограф на кнізе. Аб сваіх працах, творчым шляху расказалі Т. І. Краснова-Гусачэнка, В. В. Калтуноў, У. М. Мазго, Вольга Бялова і іншыя.
Завяршэнне фестывалю ў Касцюковічах пакінула пасля сябе прыемнае ўражанне ад яркіх мерапрыемстваў, а таксама глыбокае ўсведамленне таго, што культура - гэта падмурак, на якім будуецца будучыня краіны. Дзень беларускага пісьменства чарговы раз пацвердзіў: пакуль мы чытаем, пішам і беражліва захоўваем свае традыцыі, наша духоўная спадчына будзе заставацца невычэрпнай крыніцай сілы і натхнення для новых пакаленняў. І хай эстафета свята ўжо перададзена наступнаму гораду, святло, запаленае ў гэтыя вераснёўскія дні, будзе саграваць сэрцы беларусаў яшчэ доўга, нагадваючы пра тое, як важна заставацца вернымі свайму слову і сваёй гісторыі.
Бібліятэкар ААіІ Валянціна Самонава